استاد آفتاب اقبال ایک اور تنازع کا شکار – اینکر ایشال عدنان کے سنگین الزامات سامنے آگئے

پاکستانی میڈیا انڈسٹری کے معروف اینکر پرسن اور تجزیہ کار آفتاب اقبال ایک بار پھر خبروں کی زینت بن گئے ہیں۔ آفتاب اقبال، جنہوں نے پاکستان میں طنز و مزاح پر مبنی پروگرام حسبِ حال کے ذریعے بے پناہ شہرت حاصل کی، بعد ازاں اپنی ٹیم سے اختلافات کے باعث خبرناک اور خبردار جیسے پروگرامز کی میزبانی کرتے رہے۔ اُنہوں نے متعدد تھیٹر آرٹسٹس کو ٹی وی پر متعارف کروایا، جنہوں نے بعد میں کامیاب کیریئر بنائے۔ تاہم آفتاب اقبال کئی بار مختلف تنازعات میں بھی گھِرے رہے ہیں، اور اب ایک نیا تنازع سامنے آیا ہے۔

ایکسپریس نیوز سے تعلق رکھنے والی اینکر ایشال عدنان نے آفتاب اقبال پر سنگین الزامات عائد کیے ہیں۔ ایشال کے مطابق وہ اُس وقت ایکسپریس نیوز میں کام کر رہی تھیں جب آفتاب اقبال بھی اسی چینل پر اپنا شو ہوسٹ کر رہے تھے۔ اُن کے مطابق، جیسے ہی پروگرام کی دوسری خاتون ہوسٹ نے شو چھوڑا، انہیں پروموشن ملی — مگر اسی کے بعد اُنہیں آفتاب اقبال کی جانب سے ہراسانی اور دھمکیوں کا سامنا کرنا پڑا۔

ایشال نے الزام لگایا کہ آفتاب اقبال اُن سے “خاص احسانات” کی فرمائشیں کرنے لگے، جسے انہوں نے صاف الفاظ میں مسترد کردیا۔ انکار کے بعد آفتاب اقبال نے مبینہ طور پر کہا کہ وہ انہیں دوبارہ کبھی ٹی وی اسکرین پر نہیں آنے دیں گے۔ ایشال عدنان کا کہنا ہے کہ اس دوران معروف اداکار ناصر چنیوٹی اور روبی انعم اس تمام صورتحال کے گواہ ہیں۔ بعد ازاں، ایشال کو شو سے بھی ہٹا دیا گیا۔

واضح رہے کہ کچھ عرصہ قبل یہ خبر بھی سامنے آئی تھی کہ آفتاب اقبال کی شریکِ میزبان مریم علی حسین سے اُن کی شادی ہوئی تھی، جن سے اُن کے دو بچے بھی ہیں۔ بعدازاں دونوں کے درمیان علیحدگی ہوگئی، تاہم آفتاب اقبال اپنے دونوں بیٹوں کی پرورش میں اب بھی کردار ادا کر رہے ہیں۔