قیامت خیز زلزلہ – 800 افراد جاں بحق، ہزاروں زخمی، درجنوں گاؤں تباہ
افغانستان کے صوبہ کنڑ میں رات گئے آنے والا ہولناک زلزلہ تباہی مچا گیا۔ ابتدائی اطلاعات کے مطابق 800 افراد جاں بحق اور تین ہزار سے زائد شدید زخمی ہوچکے ہیں۔
افغان میڈیا طلوع نیوز کے مطابق زلزلے کا مرکز جلال آباد شہر کے قریب 8 کلو میٹر گہرائی میں تھا، جس کی شدت ریکٹر اسکیل پر 6 ریکارڈ کی گئی۔ زلزلے کے بعد 5 آفٹر شاکس بھی محسوس کیے گئے جن کی شدت 4.3 سے 5.2 کے درمیان رہی۔
قدرتی آفات سے نمٹنے والے ادارے کے مطابق سب سے زیادہ تباہی نورگل، سواکئی، واٹاپور، منوگی اور چپہ درہ اضلاع میں ہوئی، جہاں کئی بستیاں مکمل طور پر زمین بوس ہوگئیں۔ خدشہ ہے کہ اب بھی درجنوں افراد ملبے تلے دبے ہوئے ہیں۔
امدادی کارروائیاں جاری ہیں اور وزارتِ دفاع، داخلہ و صحت کی ٹیمیں موقع پر موجود ہیں۔ ہیلی کاپٹروں کے ذریعے زخمیوں کو ننگرہار ریجنل اسپتال منتقل کیا جا رہا ہے۔
اسلامی امارتِ افغانستان کے ترجمان ذبیح اللہ مجاہد نے حکام کو ہدایت دی ہے کہ متاثرین کی جانیں بچانے اور امداد فراہم کرنے کے لیے تمام تر وسائل استعمال میں لائے جائیں۔
زلزلے کے جھٹکے ننگرہار، لغمان، کابل سمیت خیبر پختونخوا کے مختلف علاقوں میں بھی محسوس کیے گئے۔