کراچی میں غیرت کے نام پر قتل: پسند کی شادی کرنے والا استور کا نوجوان سسر کے ہاتھوں جاں بحق
کراچی میں ایک افسوسناک واقعہ پیش آیا جہاں استور سے تعلق رکھنے والا نوجوان ارتضیٰ علی، جس نے اپنی پسند کی شادی کی تھی، غیرت کے نام پر قتل کر دیا گیا۔ واقعے میں نوجوان کی اہلیہ بھی زخمی ہوگئی۔
دیامر کے سینئر صحافی ارشد جگنو کے مطابق ارتضیٰ علی نے ایک سال قبل پٹھان فیملی کی لڑکی سے کورٹ میرج کی تھی جس کے بعد وہ گلگت منتقل ہوگئے تھے۔ بعد ازاں لڑکی کے والد نے گلگت آ کر دونوں خاندانوں کی رضامندی اور علما کی موجودگی میں صلح کر لی تھی۔
چند روز قبل یہ جوڑا کراچی اپنے سسرال آیا تھا۔ پولیس ذرائع کے مطابق ارتضیٰ علی لاہور جانے کے لیے صبح کی پرواز پر جانا چاہتا تھا اور رات آٹھ بجے کا ٹکٹ لے رکھا تھا۔ تاہم سسرال والوں نے جوڑے کو اپنے گھر بلایا اور اسی دوران لڑکی کے والد نے سب کے سامنے داماد پر گولیاں برسا دیں، جس سے وہ موقع پر ہی جاں بحق ہوگیا۔
ورثا کے مطابق مقتول کی میت گلگت روانہ کر دی گئی ہے جہاں دنیور میں اس کی نمازِ جنازہ اور تدفین ادا کی جائے گی۔ واقعے نے علاقے میں شدید غم و غصہ پیدا کر دیا ہے اور پولیس نے تفتیش شروع کر دی ہے۔